Datganiad gan Arweinydd Cyngor Rhondda Cynon Taf yn dilyn cyhoeddiad Bosch
Mae’r Cynghorydd Russell Roberts, Arweinydd Cyngor Rhondda Cynon Taf wedi mynegi’i siom bersonol yn sgîl cyhoeddiad gan gwmni Bosch ei fod yn bwriadu dod i’r gwaith cynhyrchu i ben yn ei ffatri yn y Meisgyn, a fydd yn golygu cau’r ffatri’n gyfan gwbl a nifer sylweddol o swyddi’n cael eu colli.
Meddai Russell Roberts, Cynghorydd ac Arweinydd Cyngor Bwrdeistref Sirol Rhondda Cynon Taf:
“Rydyn ni wedi’n siomi’n arw o glywed y newyddion yma, sy’n dod ar gyfnod go anodd i’r economi yn dilyn colli swyddi blaenorol yn Rhondda Cynon Taf.
“Mae ardaloedd Llantrisant a Phont-y-clun wedi gweld cannoedd o bobl yn colli’u swyddi mewn cwmnïau o fri megis L’Oreal, Staedtler a’r Serious Food Company. Dyma ergyd drom arall i’r economi leol.”
“Mae llawer o weithwyr Bosch yn byw yn y Fwrdeistref Sirol a bydd y newyddion yn ergyd drom iddyn nhw. Rydyn ni ar ddeall y gallai tua 800 o swyddi gael eu colli dros gyfnod wrth i’r gwaith cynhyrchu ddirwyn i ben yn raddol.”
“Rydw i wedi ysgrifennu at y Prif Weinidog i sicrhau bod Llywodraeth y Cynulliad yn gwneud popeth yn ei allu i hwyluso’r sefyllfa, a cheisio osgói’r sefyllfa o golli nifer sylweddol o swyddi. Serch hyny, rhaid derbyn mai penderfyniad masnachol gan Bosch yw hyn.”
“Oni fydd modd osgoi colli swyddi, rydw i wedi gofyn bod pob ffynhonnell arall o gymorth ar gael i weithwyr i’w helpu nhw i ddod o hyd i swyddi eraill neu fanteisio ar hyfforddiant a mathau eraill o gymorth.”
“Yn y tymor hir byddwn ni’n ceisio trefnu cyfarfod â’r Prif Weinidog newydd i dynnu sylw at yr holl golli swyddi, ac yn bwysicach, y swyddi mwyaf medrus, yn economi Rhondda Cynon Taf. Mae nifer y colledion yn gofyn am ymdrech ar y cyd a sylw Llywodraeth y Cynulliad, fel sydd wedi digwydd yn rhannau eraill o Gymru, a bydda i’n gweithio tuag at sicrhau’r cymorth yn fater o flaenoriaeth.”
Diwedd:-
Cynnwys wedi’i awdurdodi gan: Marketing & Communications Team
Adolygwyd ar: 22/1/2010